យើងខ្ញុំទាំងអស់គ្នា បណ្តាញព្រៃឡង់មានខេត្តព្រះវិហារ កំពង់ធំ ក្រចេះ ស្ទឹងត្រែង បណ្តាញយុជន បណ្តាញកសិករ បណ្តាញសហគមន៍នានា សហជីព និងសមាគមប្រជាធិបតេយ្យនៃសេដ្ឋកិច្ចក្រៅប្រព័ន្ធ ដែលរស់នៅតាមបណ្តាខេត្តនានាក្នុងប្រទេសកម្ពុជាមានជនជាតិដើមភាគតិច និងមិនមែនជនជាតិដើមភាគតិចដែលទទួលផល ប្រយោជន៍ផ្ទាល់ និងប្រយោលពីព្រៃឡង់ កំពុងតែមានការព្រួយបារម្ភយ៉ាងខ្លាំងចំពោះសកម្មភាពអភិវឌ្ឍជាទ្រង់ទ្រាយធំក្នុងតំបន់ព្រៃឡង់ដូចជាសម្បទានដីសេដ្ឋកិច្ច សម្បទានរ៉ែ សម្បទានព្រៃគប់ និងការកាប់បំផ្លាញព្រៃឈើអានាធិបតេយ្យដែលកំពុងកើតមានក្នុងតំបន់ព្រៃឡង់។ ជាក់ស្តែង ដើមច្បោះរបស់សហគមន៍ក្នុងព្រៃឡង់ ដែលត្រូវបានកាប់បំផ្លាញរាប់សិបម៉ឺនដើមពីសំណាក់ក្រុមហ៊ុន និងអ្នកមានអំណាចមួយចំនួន ហើយបានធ្វើឲ្យសហគមន៍យើងខ្ញុំជួបការលំបាកយ៉ាងខ្លាំង។
បើសកម្មភាពទាំងនេះនៅតែបន្តនោះ វានឹងធ្វើឲ្យធនធានធម្មជាតិដែលមានតម្លៃមហាសាលក្នុងព្រៃឡង់ដូចជាព្រៃឈើធម្មជាតិ ផលអនុផលព្រៃឈើដែលប្រជាពលរដ្ឋអាស្រ័យផល សត្វព្រៃ និងប្រភេទជីវចំរុះគ្រប់ភេទត្រូវបាត់បង់ ហើយនឹងធ្វើឲ្យប៉ះពាល់ដល់មុខរបរបប្រជាពលរដ្ឋ វប្បធម៌ប្រពៃណីជនជាតិដើមភាគតិច ជំរកសត្វព្រៃ ព្រភពជីវៈជាតិនិងប្រភពទឹកដែលហូរចាក់តំបន់ទំនាបសំរាប់វិស័យកសិម្ម ជាពិសេសធ្វើឲ្យមានការប្រែប្រួលអាកាសធាតុ និងបង្កឲ្យមានគ្រោះធម្មជាតិ ដូចជាខ្យល់ព្យុះ គ្រោះទឹកជំនន់ និងគ្រោះរាំងស្ងួតជាដើម។ល។
ព្រៃឡង់ដើរតួនាទីយ៉ាងសំខាន់សំរាប់ទ្រទ្រង់សេដ្ឋកិច្ចសហគមន៍មូលដ្ឋានជាប្រភពទឹកហូរចាក់ ចូលបឹងទន្លេសាប រក្សាលំនឹងខាងបរិស្ថាន និងការពារការបម្រែបម្រួលអាកាសធាតុក្នុងប្រទេស តំបន់ និងពិភពលោកប្រកបដោយប្រសិទ្ធិភាព។
វាជាការពិតណាស់ ការអភិវឌ្ឍន៍គឺជាតម្រូវការចំបាច់របស់រដ្ឋាភិបាល សំរាប់ប្រទេសកំពុងអភិវឌ្ឍន៍ ក៏ប៉ុន្តែយើងមានជំរើសជាច្រើនទៀតក្នុងការស្វែងរកធនធានមកធ្វើការអភិវឌ្ឍន៍ប្រទេសជាតិក្រៅពីការផ្តល់សម្បទានសេដ្ឋកិច្ចក្នុងតំបន់ព្រៃឡង់ដូចជាៈ ការថែរក្សាព្រៃឈើធម្មជាតិដើម្បីឥណទានកាបូន និងការលើកកំពស់ការច្នៃប្រឌិត ផល អនុផលព្រៃឈើជាដើម។
យើងខ្ញុំក៏បានដឹងដែរថាថ្មីៗនេះរាជរដ្ឋាភិបាលបានខិតខំប្រឹងប្រែង និងមានឆន្ទៈខ្ពស់ក្នុងតាក់តែងគោលនយោបាយ លិខិតបទដ្ឋាននានាដើម្បីការពារព្រៃឡង់តាមផ្លូវច្បាប់ ដូចជាមានគំរោងដាក់ព្រៃឡង់ជាព្រៃការពារ និងអភិរក្សជីវចំរុះ និងដាក់ជាតំបន់ឥណទានកាបូន ដើម្បីឲ្យដំណើរការនេះកាន់តែមានប្រសិទ្ធិភាពខ្ពស់ យើងខ្ញុំស្នើសុំយ៉ាងទទូចដល់រាជរដ្ឋាភិបាលមេត្តាផ្តល់ឱកាស និងពេលវេលាគ្រប់គ្រាន់ដល់បណ្តាញសហគមន៍ព្រៃឡង់ចូលរួមពិគ្រោះយោបល់ក្នុងដំណើរការនេះជាពិសេសយើងខ្ញុំទទូចដល់រដ្ឋភិបាលសុំចាត់វិធានការជាបន្ទាន់ប្រកបដោយប្រសិទ្ធិភាពខ្ពស់ក្នុងការការពារព្រៃឡង់ និងសំណូមពរដូចខាងក្រោម៖
1. បញ្ឈប់ការផ្តល់សម្បទាននានាក្នុងតំបន់ព្រៃឡង់
2. លុបអាជ្ញាប័ណ្ណគ្រប់វិស័យដែលបានផ្តល់ឲ្យក្រុមហ៊ុនក្នុងតំបន់ព្រៃឡង់
3. លុបបំបាត់សកម្មភាពកាប់បំផ្លាញព្រៃឈើអនាធិបតេយ្យក្នុងតំបន់ព្រៃឡង់
4. ទុកដីដែលបានឈូសឆាយឲ្យដុះឡើងវិញជាលក្ខណៈធម្មជាតិ
5. សុំការគាំទ្រ និងទទួលស្គាល់បណ្តាញសហគមន៍ព្រៃឡង់
6. សុំឲ្យមានកិច្ចសហការណ៍រវាងមន្រ្តីពាក់ព័ន្ធគ្រប់លំដាប់ថ្នាក់ជាមួយបណ្តាញព្រៃឡង់ក្នុងកិច្ចការពារ និងថែរក្សាព្រៃឡង់ទាំងមូលឲ្យស្ថិតស្ថេរគង់វង្ស
ធ្វើនៅសៀមរាប, ថ្ងៃទី១៤ ខែធ្នូ ឆ្នាំ២០១១
ព័ត៌មានបន្ថែមសូមទំនាក់ទំនងៈ
- លោក សេង សុខហេង តំណាងណ្តាញបសហគមន៍ និងបណ្តាញព្រៃឡង់ 092 32 46 68
- លោក វន់ ពៅ ប្រធានសមាគមវិស័យសេដ្ឋកិច្ចក្រៅប្រព័ន្ធ IDEA 012 53 47 96
- លោក ស្វាយ ភឿន បណ្តាញព្រៃឡង់ ខេត្តព្រះវិហារ 097 8010 422
- លោក ដួង សុវណ្ណារ៉ា បណ្តាញព្រៃឡង់ ខេត្តស្ទឹងត្រែង 097 6572 415
- លោក ម៉ិញ នី បណ្តាញព្រៃឡង់ ខេត្តកំពង់ធំ 097 8839093
- លោក កឹម សូខន បណ្តាញព្រៃឡង់ ខេត្តក្រចេះ 012 174941
website : www.ourpreylang.files.wordpress.com
