ក្រោយពីការឈូសកំទេចផ្ទះសំបែង អ្នកភូមិបុរីកីឡាបាននាំគ្នាតវ៉ា និងដាក់ញត្តិទៅស្ថាប័ន និងស្ថានទួតនានាដើម្បីជួយធ្វើអន្តរាគមន៏ដល់ក្រុមហ៊ុន ផាន អ៊ីម៉ិច ឲ្យពន្លឿនការដោះស្រាយ និងផ្ដល់នូវសំណងសមរម្យសំរាប់អ្នកភូមិ ព្រោះពួកគាត់សព្វថ្ងៃកំពុងជួបការលំបាក ខ្វះខាតជាច្រើនដោយបាត់បង់ផ្ទះសំបែង បាត់បង់មុខរបរ និងកូនៗរបស់ពួកគាត់បាត់បង់ការសិក្សា។
នៅក្នុងការតវ៉ា និងដាក់ញត្តិរបស់ពួកគាត់តែងមានការរារាំងពីសំណាក់អជ្ញាធរ ប៉ូលិស និងកងកំលាំងប្រដាប់អាវុធ ដោយមានកាំភ្លើង ខែល និងដំបងឆក់មកធ្វើការបង្រ្កាបទៅលើពួកគាត់យ៉ាងព្រៃផ្សៃជាទីបំផុត។
ប្រទេសកម្ពុជាសព្វថ្ងៃកំពុងជួបប្រទះការរំលោភសិទ្ធមនុស្ស និងដីធ្លី ជាច្រើននៅទូទាំងប្រទេស។ដូច្នេះ រដ្ឋាភិបាលមិនត្រូវបណ្ដែតបណ្ដោយឲ្យការរំលោភសិទ្ធទាំងនោះបន្តកើតមានទៀតទេគួរតែមានវិធានការដល់បណ្ដាក្រុមហ៊ុនដែលបានប្រព្រឹត្តអំពើរអាក្រក់ទាំងនោះ និងផ្ដល់នូវដំណោះស្រាយក៏ដូចជាសំណងសមរម្យសំរាប់ប្រជាពលរដ្ឋដែលរងគ្រោះពីអំពើររំលោភបំពានទាំងនោះដើម្បីឲ្យប្រទេសកម្ពុជាក្លាយទៅជាប្រទេសដែលមានលទ្ធិប្រជាធិបតេយ្យ និងគោរពសិទ្ធមនុស្សយ៉ាងពិតប្រាកដ៕
