សំលេងសហគមន៍

Friday, July 15, 2011

ការឆូសឆាយដីរបស់ក្រុមហ៊ុនភាពីមិចកមលើដីរបស់ប្រជាជននៅឃុំអន្សារចំបក់

យ៉ាងហោចណាស់មានប្រជាពលរដ្ឋប្រហែលជា៣០០នាក់បាននាំគ្នាទៅតវ៉ាដីដែលក្រុមហ៊ុនភាពីមិចបានរំលោភយកកាលពីថ្ងៃទី២៤ខែកក្ដដា។
ប្រជាជនប្រមាណ៣០០នាក់បាននាំគ្នាទៅធ្វើការតវ៉ាដីដែលត្រូវបានក្រុមហ៊ុនភាពីមិចរំលោភយកដែលដីទាំងអស់មានខ្លះជាកម្មសិទ្ធិរបស់ពួកគាត់កាលពីថ្ងៃទី២៤ខៃកក្ដដាឆ្នាំ២០១០នៅភូមិអារ៉ងព្រួចភូមិថ្កោលតូចភូមិថ្កោលធំភូមិខ្សាច់ល្អិចនិងភូមិសាន់សរ។
ប្រជាពលរដ្ឋបានប្រមូលគ្នាដើម្បីចេញដំណើរពីម៉ោង៨ដោយធ្វើដំណើរតាមរៈយការជិះឡានប៉ុន្ដែនៅពេលដែលក្រុមប្រជាពលរដ្ឋបានជិះឡានមកដល់ មុខប៉ុសប៉ូលិសបានឃាត់ឡានរបស់ប្រជាពលរដ្ឋដោយសួរថាតើអ្នកណាជាអ្នកដឹកនាំពេលនោះប្រជាពលរដ្ឋបានឆ្លើយថាគ្មានអ្នកជាអ្នកដឹកនាំនោះទេគឺប្រជាពលរដ្ឋស្មះចិត្តដោយខ្លួនឯងហើយនៅភូមិសាន់សរស្រាប់តែប៉ូលិសប្រជាពលរដ្ឋក៏និយាយទៀតថាបើឡានដឹកប្រជាពលរដ្ឋទៅតវ៉ារឿងដីលោកប៉ូលិសឯងឃាត់ហើយបើឡានដឹកក្រយ៉ូងវិញមិនឃើញចាប់នោះទេ។ពេលនោះប៉ូលិសនៅតែមិនព្រមអោយឡានដែលពួកគាត់ជិះនោះទៅដដែលប៉ុន្ដែទោះជាយ៉ាងណាប្រជាពលរដ្ឋបានធ្វើដំណើរដោយថ្មើរជើង។រហូតដល់ទីរួមស្រុកក្រគរពេលទៅដល់គេមិនព្រមអោយប្រជាពលរដ្ឋចូលឡើយបន្ទាប់មកប្រជាពលរដ្ឋក៏នាំគ្នាបិទផ្លូវជាតិលេខ៥ធ្វើអោយអ្នកដំណើរមិនអាចឆ្លងកាត់បាន។ពេលឃើញដូចច្នេះទើបព្រមអោយប្រជាពលរដ្ឋចូលក្នុងមន្ទីរស្រុកពេលនោះមានមន្ដ្រីស្រុកបានចេញមុខមកចរចាជាមួយប្រជាពលរដ្ឋ។
ក្រុមប្រជាពលរដ្ឋបានលើកឡើងអំពីការដែលក្រុមហ៊ុនភាពីមិចបានរំលោភយកដីរបស់ពួកគាត់ដោយមិនប្រាប់និងសួរពួកគាត់អោយបានច្បាស់ឡើយរឺក៏ដឹងតាមរយៈលោកមេភូមិនោះឡើយហើយក៏មានអ្នកខ្លះលើកឡើងពីសំនើរនិងសំនូមពរជាច្រើនដើម្បីអោយមន្ដ្រីស្រុកជួយដោះស្រាយអោយបានឆាប់ៗ។
ពេលនោះសំនួរខ្លះដែលបានសួរក៏បានឆ្លើយខ្លះក៏មិនបានឆ្លើយចំនែកឯងការធ្វើសំនើរនិងសំនូមពរអោយមន្ដ្រីស្រុកធ្វើការដោះស្រាយត្រូវបានគាត់ឆ្លើយប្រាប់ថានិងដោះស្រាយក្នុងរយៈពេលបីថ្ងៃទៀត។ការរំពឹងទុករបស់ប្រជាពលរដ្ឋទៅថ្ងៃមុខសង្ឃឹមថាថ្នាក់ដឹកនាំស្រុកខេត្តដោះស្រាយបានឆាប់ៗហើយពួកគាត់និងមិនបាត់បង់ដីដែលជាកម្មសិទ្ធិរបស់ពួកគាត់នោះឡើយព្រោះពួកគេអាស្រ័យទៅលើដីស្រែចំការរបស់ពួកគេទៅថ្ងៃអនាគត់ប៉ុន្ដែរហូតមកដល់ពេលនេះពុំទាន់មានការដោះស្រាយនៅឡើយទេ។

ក្រុមហ៊ុនភាពីម៉ិចមកដល់ឃុំអញ្ចាញរូង

បន្ទាប់ពីធ្វើការឈូសឆាយដាំដំឡូងមី និងដាំដើមប្រេងខ្យល់នៅខេត្តពោធិ៍សាត់ក្រុមហ៊ុនភាពីម៉ិច គ្រុប ក៏បានបោះជំហ៊ានចូលដល់ខេត្តកំពង់ឆ្នាំង។

យោងតាមរបាយការណ៏របស់ក្រុមប្រឹក្សាឃុំ អញ្ចាញរូង បានឲ្យដឹងថា៖ កាលពីថ្ងៃទី ១១ខែ មិថុនា ឆ្នាំ ២០១១ នៅសាលាឃុំអញ្ចាញរូង លោកទី គឹមតុក ក្រុមប្រឹក្សាខេត្តពោធិសាត់និងជាតំណាងឲ្យក្រុម ហ៊ុនភាពីម៉ិចគ្រុបបានមកជួបប្រជុំពិភាក្សាជាមួយក្រុមប្រឹក្សាឃុំ និង លោក មេភូមិទាំង៦ភូមិ អំពីបញ្ហា ដីសម្បទានសេដ្ឋកិច្ចដែលស្ថិតនៅក្នុងឃុំអញ្ចាញរូងស្រុក បរិបូណ៍ ខេត្ត កំពង់ឆ្នាំង ។

មានប្រសាសន៍ក្នុអង្គប្រជុំនោះ លោក ទី គឹមតុក បានលើកឡើងថា៖ វត្តមានរបស់ក្រុម ហ៊ុនភាពីម៉ិចនៅជំហ៊ានដំបូងនេះគឺធ្វើការកំណត់ព្រំដីដែលពាក់ព័ន្ធជាមួយក្រុមហ៊ុនភាពីម៉ិច. បន្ទាប់មកយើងនិងធ្វើ ការស្រង់ស្ថិតិដីនិងប្រជាពលរដ្ឋដែលពាក់ព័ន្ធជាមួយដីសម្បទានសេដ្ឋកិច្ចដែលក្រុមហ៊ុនបានទទួលពី រដ្ឋាភិបាល ។ ការស្រង់ស្ថិតិដីនិងប្រជាពលរដ្ឋគឺស្រង់តែក្នុងដីសម្បទានតែប៉ុណ្ណោះ រីឯដីវិញគឺសំដៅទៅលើដីស្រែដីចំការដីភូមិនិងដីផ្សេងៗដែលមានពាក្យកាន់កាប់ឬគ្មានពាក្យកាន់កាប់ក្ដីគឺស្រង់ទាំងអស់ដើម្បីធ្វើការពិចារណានិងធ្វើការកាត់ចេញពីដីសម្បទាន របស់ក្រុមហ៊ុន ។

ថ្ងៃទី ១៤ - ១៥ ខែ មិថុនា ឆ្នាំ ២០១១ ក្រុមការងារនៃក្រុមហ៊ុន ភាពីម៉ិច បានមកសហការជាមួយ ក្រុមប្រឹក្សាឃុំ លោកមេភូមិទាំង៦ភូមិ និងអាជ្ញាធរស្រុក បរិបូណ៍ ដើម្បីចុះកំណត់ព្រំដីពាក់ព័ន្ធដោយ ធ្វើការបោះបង្គោលនិងបាញ់ថ្នាំក្រហមតាមបង្គោលនិងតាមដើមឈើជាច្រើនដែលមានចំណុច UTM=០៤៣៤០០០/១៣៦៣០០០រហូតដល់ចំណុច UTM=០៤៣៤០៧៥/១៣៨៥០០ពីព្រំប្រទល់ឃុំ អញ្ចាញរូងទល់និង ឃុំ ពេជចង្វារខាងជើងទៅដល់ព្រំប្រទល់ឃុំ អញ្ចាញរូង ខាងត្បូងនៃឃុំ ប្រស្នឹប ។ បន្ទាប់ពីធ្វើការកំណត់ព្រំដីរួចមកក្រុមការងារក៏បានបន្តដំណើរការស្រង់ស្ថិតិដីនិងប្រជាពលរដ្ឋ ដែល ពាក់ព័ន្ធជាមួយក្រុមហ៊ុនភាពីម៉ិច ។ លទ្ធផលនៃការស្រង់ស្ថិតិមានដូចខាងក្រោម៖

១.ផ្ទៃដីពាក់ព័ន្ធសរុបៈ ៤១៦៣.៩ហិកតា...ក្នុងនោះមាន ដីស្រែចំនួន ១៥៩៦ ហិកតា...ដីចំការចំនួន ៦១២ ហិកតា... ដីភូមិចំនួន ៤០៧.២ ហិកតា... ដីព្រៃសម្រាប់បង្កើតសហគមន៍ចំនួន ១៥០៧.០៥៦ ហិកតា... ដីចំណីស្ទឹងចំនួន ៣៥ ហិកតា និងដីផ្សេងៗ ចំនួន ៦.៥ ហិកតា ។ រីឯស្ថិតិគ្រួសារពាក់ព័ន្ធ ជាមួយដីសម្បទានសេដ្ឋកិច្ចសរុបមានចំនួន ៥៨៧គ្រួសារនិងមានសមាជិកសរុបចំនួន ២៧០៤ នាក់។

ការចុះស្រង់ស្ថិតិដីនិងគ្រួសារដែលពាក់ព័ន្ធជាមួយក្រុមហ៊ុន ភាពីម៉ិច បានចប់នៅថ្ងៃទី ៣០ ខែ មិថុនា ឆ្នាំ ២០១១ ហើយក្រុមប្រឹក្សាឃុំក៏បានបញ្ជូនរបាយការណ៍នេះទៅស្រុករួចហើយ ។ តាមប្រសាសន៍ របស់អ្នកស្រី ប៉ិញ អាត ប្រធាន សហគមន៍ព្រៃឈើស្ទឹង ខ្សាច់សរ ឃុំ អញ្ចាញរូង បានឲ្យដឹងថា៖ រហូតមកដល់ពេលនេះប្រជាពលរដ្ឋទាំង ៥៨៧គ្រួសារដែលមានដីស្ថិតក្នុងតំបន់ដីសម្បទាននៃក្រុមហ៊ុន ភាពីម៉ិច កំពុងព្រួយបារម្ភពីបញ្ហាដីធ្លីរបស់ពួកគាត់ដោយមិនទាន់ឃើញរាជរដ្ឋាភិបាលឬក្រុមហ៊ុនមកប្រកាសកាត់ដីទំហំ ៤១៦៣.៩ ហិកតានេះឲ្យដល់ពួកគាត់នៅឡើយ ។

ស្ថិតក្នុងវ័យប្រមាណជាង ៤០ឆ្នាំ អ្នកស្រី ឆៅ សាវឿន ជាអនុប្រធានសហគមន៍ព្រៃឈើបានមាន ប្រសាសន៍ទាំងទឹកមុខក្រៀមក្រំប្រាប់មកក្រុមអ្នកស្ម័គ្រចិត្តផលិតព័ត៌មានសហគមន៍យើងថា៖ ដីព្រៃឈើគឺ ជាអាយុជីវិតរបស់ប្រជាជនបើគ្មានដីសម្រាប់ធ្វើស្រែចំការសង់លំនៅដ្ឋាននិងគ្មានព្រៃឈើ សម្រាប់សង់ផ្ទះធ្វើអុសដុតនោះទេ យើងនឹងជួបគ្រោះមហន្តរាយជាមិនខាន.....ត្បិតជីវិតអ្នកស្រែគឺ ពឹងពាក់អាស្រ័យផល់ទៅលើដីធ្លីនិងព្រៃឈើនេះឯង ។

ទាក់ទងនិងការកាត់ដីចេញពីដីសម្បទានសេដ្ឋកិច្ចនេះក្រុមអ្នកស្ម័គ្រចិត្តផលិត ព័ត៍មានសហគមន៍និង ធ្វើការអធិប្បាយបន្តនៅពេលក្រោយ ។

ហង្ស មាស

Thursday, July 14, 2011

រំពឹងថានឹងមានការបណ្តេញចេញ បន្ទាប់ពីកាលកំណត់ពេលចុះឈ្មោះជនចំណាកស្រុក

ដោយ Kate Bartlett
THE CAMBODIA DAILY

កម្មករកម្ពុជាជាង១៧០.០០០នាក់នៅក្នុងប្រទេសថៃ បានចុះឈ្មោះជាមួយអាជ្ញាធរថៃ មុនការបញ្ចប់រយៈពេលអនុគ្រោះ៣០ថ្ងៃនៅថ្ងៃនេះ សម្រាប់កម្មករដែលគ្មានលិខិតស្នាម។ ជនចំណាកស្រុកកម្ពុជាដែលខកខានមិនបានចុះឈ្មោះជាមួយអាជ្ញាធរ ពេលនេះជួបហានិភ័យនៃការចាប់ខ្លួននិងការបណ្តេញចេញភ្លាមៗ។ លោក អេនឌី ហល អ្នកជំនាញផ្នែកចំណាកស្រុកនៅវិទ្យាស្ថានស្រាវជ្រាវប្រជាជននិងសង្គម របស់សាកលវិទ្យាល័យ ម៉ាហ៊ីឌុល ក្នុងក្រុងបាងកក បានថ្លែងថា វាមិនអាចទៅរួចទេក្នុងការដឹងពីចំនួនជនចំណាកស្រុកកម្ពុជាដែលនៅមិនទានចុះឈ្មោះក្នុងប្រទេសថៃនោះ ប៉ុន្តែថា ទំនងជាមានចំនួនតិចជាងមុនច្រើន ព្រោះថាដំណើរការចុះឈ្មោះបាន "ទទួលជោគជ័យដ៏ធំមួយ"។

លោក ហល បានកត់សំភាល់ថា ការបង្ក្រាបទៅលើពលករដែលគ្មានលិខិតស្នាមកន្លងមកដោយអាជ្ញាធរថៃ គឺមិនអាចទៅរួចទេ ដោយសារតែចំនួនដ៏ច្រើនសន្ធឹកសន្ធាប់នៃជនចំណាកស្រុកខុសច្បាប់ ដែលជារឿយៗកើតមានការរំលោភបំពានលើអ្នកដែលត្រូវបានចាប់ខ្លួន។ លោក ហល បានថ្លែងថា បញ្ហានេះបាននាំឲ្យមានការចាប់ខ្លួន និងការជំរិតទារប្រាក់មុនពេលដោះលែង ដោយរំលោភសិទ្ធិមនុស្ស ដោយលោកបន្ថែមថា ក៏មាន ការបណ្តេញចេញមិនត្រឹមត្រូវតាមច្បាប់ដែលបង្កើនហានិភ័យនៃការជួញដូរផលដែរ៕៚

Wednesday, July 13, 2011

ក្រុមអ្នកតវ៉ាតំបន់បឺងកក់ដែលត្រូវបាន ចាប់ខ្លូន ត្រូវបានដោះលែងវិញ ហើយ

ដោយ ហ៊ុល រស្មី

ស្រ្ដីពីរនាក់ដែលចាប់ខ្លូននៅក្នុង ភ្នំពេញកាលពី ថ្ងៃព្រហស្បតិ៍ខណៈដែលធ្វើការតវ៉ាពីការបណ្ដេញចេញដែលជិតនឹងកើតឡើងចំពោះអ្នកភូមិតំបន់បឹងកក់ ប្រហែល១.៥០០គ្រួសារនោះត្រូវបានដោះលែងកាលពីថ្ងៃសក្រ។

អ្នកស្រី ណុន សុខេង អ្នកស្រី ទេព វណី្ណ ត្រូវបានចាប់ខ្លូនខណៈពេលដែលព្យាយាមចូលរូមជាមូយអ្នកតវ៉ាជាង ១០០នាក់ដែលត្រូវបានរារាំងដោយនគរបាលនៅមុខសាលារាជធានីភំ្នពេញ។ ក្រុមនេះដើរទៅកាន់សាលារាជធានីភ្នំពេញ ដើម្បីទាម ទារសុំការពន្យល់លិខិត មូយដែលសាលា រាជធានីភ្នំពេញ បានចេញនាព្រឹកនោះ ដោយច្រាលចោលសំណើរបស់ខ្លូនសុំផ្ទះល្វែងជាន់ផ្ទាល់ដីមូយកន្លែងនៅនិងតំបន់បឹងកក់ដើម្បីជំនូស ផ្ទះដែលពូកគាត់បាត់បង់។
កាលពីម្សីលមិញ អ្នកស្រី សុខេងបាននិយាយថា អ្នកស្រី និង អ្នកស្រី វណី្ណ ត្រូវបានដោះលេងពីស្នងការដ្ថាននគរបាល កាលពីរសៀលថ្ងៃសុក្រ ប៉ុន្តែបន្ទាប់ពីអ្នកស្រីបដិសេធមិនព្រមផ្ដិតមេដៃលើលិខិតមូយ សារភាថា បានរំខានដល់ភាពស្ងប់ស្ងាត់តែប៉ិណ្ណោះ។ អ្នកស្រីបាននិយាយថា"ខ្ញុំមិនផ្ដិតមេដៃទេ ពីព្រោះខ្ញុំមិនបាន ប្រព្រឹត្តបទឧក្រិតណាមូយឡើយ" នៅក្នុងសេចក្ដីថ្លែងការណ៍មូយដែលបានដាក់តាមវេបសាយរបស់ខ្លូន ហើយចុះកាលបរិច្ចេទថ្ងៃព្រហស្បតិ័ សាលារាធានីភ្នំពេញបានបន្ទោស់ការតវ៉ានេះទៅលើការញុះញង់ពីសំណាក់ "អ្នកខាងក្រៅ" ដែលមិនប្រាប់ឈ្មោះ ។ សេចក្ដីថ្លែងការណ៍នេះបាន លើក ឡើង ថា" សាលារាធានីភំ្នពេញសូមអំពាវនាវអ្នក ភូមិដែលនៅសេសសល់មេត្តាស្ងប់ស្ងាត់ហើយកុំជឿរពាក្យញុះញង់ណាមូយពីសំណាក់ខាងក្រៅឲ្យប្រឈមមុខជាមួយក្រុមអាជ្ញាធរ ដើម្បីផល់ប្រយោជន៍ផ្ទាល់ខ្លួនពួកគេឲ្យសោះ។ការតវ៉ាបន្តបែបនេះប្រឆាំងក្រុមអាជ្ញាធររាជធានីភ្នំពេញ...គឺមិនអាចទទួលយកបានទេ។ដូច្នោះហើយក្នុងនាមអាជ្ញាធរមូលដ្ថាន ត្រូវតែចាត់វិធានការសមស្របដើម្បីរក្សាសណ្ដាប់ធ្នាប់សាធារណៈដល់អ្នករស់នៅក្នុងរាជធានីទាំងអស់"។

អ្នកស្រីសុខេងបានបរិសេធការចោទប្រកាន់នេះ។ អ្នកស្រីបាននិយាយថា" គ្មានការញុះញង់ពីនរណាម្នាក់ក្រៅពីសហគមន៍បឹងកក់ក្នងការធ្វើការតវ៉ានេះទេ" ។ អ្នកស្រីតុល ស្រីពៅជាអ្នកតវ៉ាម្នាក់ទៀតបាននិយាយថាអ្នកភូមីតំបន់បឹងកក់ នឹងបន្តធ្វើការតវ៉ារហូតដល់ការទាមទារសុំផ្ទះសម្បែងរបស់ខ្លូនត្រូវបានឆ្លើយតប។ អ្នកស្រីបាននិយាយថា "ខ្ញុំត្រៀមស្លាប់នៅថ្ងៃនេះដើម្បីជម្រកសំរាប់កូនៗរបស់ខ្ញុំទៅថ្ងៃអនាគត ។ យើងនិងបន្តការតវ៉ារហូតដល់សាលារាជធានីភ្នំពេញរកដំណោះស្រាយច្បាស់លាស់ដល់ពុកយើង" ។ លោកស្រៀងភារម្យនាយកលេខាធិកាដ្ថាន នៃក្រុមការងារពិសេសសិទ្ធិលំនៅដ្ថាន ជាអង្គការក្រៅរដ្ថានភិបាលបានព្យាករណ៍ថា ការតវ់ានេះអាចនឹងកាន់តែធ្ងន់ធ្ងរទៅ។
ដោយលើកឡើងពីជំលោះដីធ្លីដែលបានប្រែក្លាយជាហឹង្សានៅកន្លែងដទៃទៀត ទូទាំងប្រទេសនោះ
លោកមានប្រសាសន៍ថាត្រឺមត្រូវ។

អ្នកភូមិបឹងកក់ប៉ះទង្គិចជាមួយសមត្ថកិច្ចនៅពេលនាំគ្នាយកញតិ្តទៅដាក់នៅសា្ថនទូតអង់គ្លេស

ភ្នំពេញ:អ្នកភូមិបឹងកក់ប្រមាណជាង១០០នាក់កាលពីព្រឹកថ្ងៃទី៧កក្តដានេះបានប៉ះទង្គិចជាមួយសមត្ថកិច្ចខណៈពេលបាននាំគ្នាយកញតិ្តទៅដាក់នៅស្ថានទូតអង់គ្លេសប្រចាំកម្ពុជា។ ទោះបីជាពុំមានអ្នករបួស ប៉ុនែ្ដស្រ្ដីពីរនាក់ត្រូវបានសមត្ថកិច្ចឃាត់ខ្លួនបណ្ដោះអាសន្ន បញ្ជូនទៅស្នងការដា្ឋនប៉ូលីសរាធានីភ្នំពេញ។
ប្រជាពលរដ្ឋនិយាយថានៅព្រឹកថ្ងៃទី៧ខែកក្ដដានេះប្រជាពលរដ្ឋរស់នៅបឹងកក់ជាង១០០អ្នកបានបាំគ្នាយកញត្តិទៅប្រគល់ជូនស្ថានទូតអង់គ្លេស់ប្រចាំកម្ពុជា។ ខ្លឹមសារញតិ្តគឺសុំឲប្រទេសមហាអាណាចមួយនេះជំរុញដល់រាជរដ្ឋាភិបាលកម្ពជាជាឲជួយពួកគាត់បានទទួលដីទំហំ៤ម៉ែត្រគុណនឹង១៦ម៉ែត្រសង់ផ្ទះផ្ទាល់ដីដោយមិនទទួលយកខុនដូសែលរាជរដ្ឋាភិបាលគ្រោង-សង់ជូនពួកគាត់ឡើយ
បន្ទាប់ពីយកញតិ្តជូនស្ថានទូតគង់គ្លេសរួចពួកគាត់បាននាំគ្នាដើរតាមផ្លូវព្រះមុនីវង្សឆោះទៅសាលារាជធានីភ្នំពេញត្រូវបានសមត្ថកិច្ចរារាំងនៅមុខសណ្ឋគារភ្នំពេញ។ ការប្រទូស្តរ៉ាយ-និងសម្រែកតវ៉ាបានកើតឡើយ។អ្នកភូមិពីរនាក់ត្រូវបានសមត្ថកិច្ចឃាត់ខ្លួន-គឺឈ្មោះទេព វណ្ណីភេទស្រី អាយុ៣៤ឆ្នាំរស់នៅភូមិ២២និងឈ្មោះណន់ សុខ-ខេង ភេទស្រី អាយុ២៨ឆ្នាំ រស់នៅភូមិ២៣ រួចបញ្ជូនទៅស្នងការដ្ឋានប៉ូលីសរាជធានីភ្នំពេញភ្លាម។
សមត្ថកិច្ចបានរុញច្រានក្រុមអ្នកតវ៉ារហូតដល់ផ្លូវលែខ៨៦ ខាងជើងសណ្ឋាគារភ្នំពេញហើយពួកគាត់ស្រែកទាមទារឲដោះលែងស្រ្ដីពីរអ្នកមកវិញ ។ រហូតដល់ម៉ោង១០កន្លះសមត្ថកិច្ចបានប្រាប់ទៅក្រុមអ្នកតវ៉ាថាបើក្រុមអ្នកតវ៉ានាំគ្នារំសាយសមត្ថកិច្ចនិងដោះលែងស្រ្ដីពីរអ្នកនាក់នេះទៅវិញនា-រសៀលម៉ោង៣ ។
គួររំលឹកថា ថ្មីៗនេះភូមិបឹងកក់បាននាំគ្នាយកញតិ្តទៅដាក់នៅសហគមន៏អឺរ៉ុប( EU )ស្ថានទូតបារាំងស្ថានទូតអាមេរិក និងចុងក្រោយនេះដាក់នៅស្ថានទូតអង់គ្លេស ក្នុងគោលបំណងឲរដ្ឋាភិបាលប្រទេសទាំនោះជំរុញដល់រាជរដ្ឋាភិបាលកម្ពជាយល់ព្រមតាមសំណើររបស់ពួកគាត់ គឺប្រគល់ដីទំះំ៤មែត្រគុណនៅជាន់ផ្ទាល់ដី ហើយបដិសេធបិនទទួលយកខុនដូឡើយ ។
សាលារាជធានីភ្នំពេញបានប្រកាសរួចហើយ គឺដីតំបន់បឹងកក់-រាជដ្ឋាភិបាលបានប្រគល់ឲក្រុមហ៊ុនស៊ូកាកូអ៊ីនវិនិយោគរួចហើយ ហើយក្រុមហ៊ុនសង់ខុនដូជូនប្រជាពលរដ្ឋ ។
ពីមុនប្រជាពលរដ្ឋរស់នៅតំបន់នេះ ចំនួន៤.២៥២គ្រួរសារបច្ចុប្បន្ននៅសល់ប្រមាណតែ១.២០០គ្រួសារប៉ុណ្ណោះ ៕ណូរ៉ា

ជនចំនាកស្រុកដុតបំផ្លាញ់ព្រៃឈើយកដីដាំដំទ្បុងមីកើនខ្លាំងនៅស្រុកសៀមបូក

ស្ទឹងត្រែង ៖ សកម្មភាពជនចំណាកស្រុកដែលជាបងប្អូនខ្មែរអ៊ិស្លាមរួមទាំងប្រជាពលរដ្ឋខ្មែរ និងពួកអ្នកមានលុយមួយចំនួនបានកាន់កាប់រុករានយកដីព្រៃរបស់រដ្ឋធ្វើកម្មសិទ្ធ ដើម្បីដាំដំទ្បូងមីបានកើតទ្បើងខ្លាំងនៅតំបន់ភ្នំក្រហមឃុំអូរឫស្សីកណ្ដាល ស្រុក សៀមបូក ខេត្ត ស្ទឹងត្រែង ។

បើយើងជិះរថយន្តតាមផ្លូវលំមួយខ្សែពីចំនុចភ្នំក្រហម ចូលទៅកាន់ទីរួមស្រុកសៀមបូក នោះយើងនឹងឃើញមានប្រជាពលរដ្ឋជាច្រើនកំពុងសម្អាត់ដីរបស់ពួកគេដាំដំទ្បូងមី ។ នៅតំបន់នោះ កាលពីប៉ុន្មានឆ្នាំមុនមិនទាន់មានអ្នកទៅបោះទីតាំងយកដីដាំដំណាំដំទ្បូងមីច្រើនបែបនេះទេ គឺគ្រាន់តែមានដីចម្ការបន្តិចបន្តួចតែប៉ុណ្ណោះ ។ បច្ចុប្បន្នដំទ្បូងមីកំពុងមានទីផ្សារខ្ពស់អ្នកចំនូលថ្មី និង ប្រជាពលរដ្ឋនៅតំបន់នោះ បានកាន់កាប់យកដីរដ្ឋបែបអនាធិបតេយ្យ ។ ជាពិសេសបងប្អូនខ្មែរចំណាកស្រុកអ៊ិស្លាមមកពីខេត្តកំពង់ចាម កើនទ្បើងគួរឲ្យបារម្ភ ។ ព្រៃនៅតំបន់នោះសព្វថ្ងៃនេះបានប្រែក្លាយជាវាលដ៏ធំល្វិងល្វើយអស់ទៅហើយដោយសារតែគ្មានអ្នកគ្រប់គ្រងច្បាស់លាស់ ។

អាជ្ញាធរមូលដ្ឋាន បានឲ្យដឹងថារឿងកាប់រុករានយកដីព្រៃរបស់រដ្ឋនៅតំបន់ភ្នំក្រហម នោះគ្មានអ្នកណាហ៊ាននិយាយបានទេ ព្រោះវាពាក់ព័ន្ធដល់ស្រុក និង ថ្នាក់ដឹកនាំខេត្ត ។ បងប្អូនខ្មែរអ៊ិស្លាម គឺមុខសញ្ញាខ្លាំងខាងកាប់ព្រៃរាប់សិបហិចតាក្នុងមួយគ្រួសារយកធ្វើជាកម្មសិទ្ធិ ។ពួកគេអាងអ្នកធំនៅពីក្រោយខ្នងហើយអ្នកខ្លះទៀតរស់គ្រាន់តែចាំដីឲ្យអ្នកមានលុយតែប៉ុណ្ណោះ ៕

អ្នកស្រុកនៅសហគមន៏បុរីកីឡាតវ៉ាពីពាក្យបណ្ដឹងរបស់ប្រធានសហគមន៏

ដោយ ឃីសុវុឌ្ឍី

THE CAMBODIA DAILY

អ្នក ស្រុក នៅ សហគមន៏ បុរីកីឡា ប្រ ហែល ១០០ នាក់ បាន ធ្វើ ការ តវ៉ា នៅ សាលា ដំបូង រាជធានី ភ្នំពេញ កាល ពី ព្រឹក ថ្ងៃ ម្សិល មិញ បន្ទាប់ ពី តុលាការ បាន កោះ ហៅ តំ ណាង សហគមន៏ ៥ នាក់ មក ធ្វើ ការ សាក សួរ ពាក់ ព័ន្ធ ពាក្យ បណ្ដឹង មួយ ដែល ត្រូវ បាន ប្ដឹង ដោយ លោក កងសេដ្ឋ ជា ប្រ ធាន សហគមន៏ ។

អ្នក ស្រី ភួង សុភាព ជា តំណាង សហគមន៏ បាន មាន ប្រ សាសន៏ ថា ពាក្យ បណ្ដឹង នេះ បាន កើត មាន បន្ទាប់ ពី មាន ការ តវ៉ា ដោយ ក្រុម សហគមន៏ កាល ពី ថ្ងៃ ទី ២៤ ខែ មិថុនា ។ ក្រុម អ្នក តវ៉ា ដែល មិន សប្បាយ ចិត្ត ដោយ សារ ពួក គាត់ មិន បាន ទទួល ផ្ទះ ល្វែង ដូច ដែល បាន សន្យា បន្ទាប់ ពី មាន ជម្លោះ ដី ធ្លី ដ៏ អូស បន្លាយ មួយ ចាប់ ពី ឆ្នាំ ២០០៣ មក មាន ការ ព្រួយ បារម្ភ ជុំ វិញ ប្រ ភព នៃ ខិតប័ណ្ណ ដែល ត្រូវ បាន ចែក ចាយ នៅ ក្នុង តំបន់ រស់ នៅ របស់ ខ្លួន ដោយ ប្រ ធាន សហគមន៏ ផ្សេង ទៀត ។

ខណៈ ដែល ពួក គាត់ បាន ដើរ កាត់ ផ្ទះ របស់ លោក កង សេដ្ឋ ដោយ ពិភាក្សា គ្នា ពី ខិតបណ័្ណ នោះ ពួក គាត់ បែ ជា ជាប់ ពាក់ ពន័្ធ នៅ ក្នុង ជម្លោះ ជា មួយ អ្នក ស្រី ហ៊ឹង វណ្ណា ជា ប្រពន្ធ របស់ គាត់ ទៅ វិញ ។

លោក កង សេដ្ឋ បាន មាន ប្រ សាសន៏ ថា លោក បាន ដាក់ ពាក្យ បណ្ដឹង ដោយ សារ ក្រុម អ្នក តវ៉ា បាន "រំ លោភ បំពាន មក លើ ក្រុម គ្រួ សារ និង ផ្ទះ សម្បែង របស់ លោក" ។ អ្នក ស្រី ភួង សុភាព បាន និយាយ ថា លោក កង សេដ្ឋ កំពុង ស្វែង រក សំណង ជា ប្រាក់ ចំនួន ៣០.០០០ ដុល្លារ ពី តំណាង ម្នាក់ៗ ។

លោក ហ៊ឹង ប៊ុនជា ជា ព្រះ រាជ អាជ្ញា រង បាន មាន ប្រសាសន៏ ថា លោក រវល់ ណាស់ មិន អាច សាក សួរ អ្នក តំណាង ទាំង នេះ បាន ទេ កាល ពី ម្សិល មិញ ហើយ នឹង ការ កោះ ហៅ ពួក គេ ម្ដង ទៀត ៕E

Monday, May 2, 2011

ក្បួនដង្ហែរដ៏ធំមួយដឹកនាំដោយសហភាពការងារកម្ពុជា ក្នុងទិវាពលកម្មអន្តរជាតិ ខួបលើកទី១២៥

ក្បួនដង្ហែរមកដល់រង្វង់មូលសម្តេចសង្ឃរាជ ជួន ណាត

រាជធានីភ្នំពេញ៖ ក្នុងឱកាសរំលឹកខួបលើកទី១២៥ នៃទិវាពលកម្មអន្តរជាតិ ១ ឧសភា ២០១១ នេះ កម្មករ កម្មការិនី ប្រមាណជា៣០០០នាក់ មកពីគ្រប់វិស័យបាន មកជួបជុំគ្នានិងធ្វើការដង្ហែរក្បួន ពីសួនច្បារខាងកើត ក្រុមប្រឹក្សាអភិវឌ្ឍន៍ជាតិ ឆ្ពោះទៅកាន់មុខរដ្ឋភាជាតិ ដើម្បីអបអរសាទរ ទិវាពលកម្មអន្តរជាតិផង និងដើម្បីដាក់សំណើរជូនរដ្ឋសភាជាតិ រាជរដ្ឋាភិបាល និងដាក់ញាតិជូនក្រសួងយុត្តិធម៌។

យោងតាមសម្តីលោក អាត់ ធន់ ប្រធានសហភាពការងារកម្ពុជា បានឲ្យដឹងថាសហភាពការងារកម្ពុជា ដែលមានឈ្មោះហៅកាត់ថា CLC ជាអង្គការវិជ្ជាជីវៈឯករាជ្យ មានសមាជិកប្រមាណ៦០០០០ (ប្រាំមួយម៉ឺន) នាក់ មកពីសហព័ន្ធសហជីព និងសមាគមចំនួន ៧ បានពិនិត្យឃើញថា ប្រមាណ២ ទៅ ៣ ឆ្នាំចុងក្រោយនេះ ស្ថានភាពសិទ្ធិការងារកាន់តែអាក្រក់ទៅៗ ឧទាហរណ៍ដូចជាការចាប់ខ្លួនថ្នាក់ដឹកនាំសហជីពដាក់គុក ប្តឹងថ្នាក់ដឹកនាំសហជីពទៅតុលាការ បញ្ឈប់ថ្នាក់ដឹកនាំសហជីព ការប្រើកិច្ចសន្យាខ្លី ការរើសអើងការបង្កើតសហគមន៍-សមាគម កសិករ គ្រូបង្រៀន និងមន្ត្រីរាជការ
ការឡើងថ្លៃនៃទំនិញគ្រប់យ៉ាង (រួមមានប្រសាំង) ជាមួយនឹងការផាកពិន័យពីសំណាក់មន្រ្តីនរគបាលចរាចរណ៍មួយចំនួន ទៅលើអ្នករត់ម៉ូតូឌុប ម៉ូតូកង់បី និងឡានតាក់ស៊ី លើសពីសៀវភៅបន្ទុកជាដើម។

លោក អាត់ ធន់ បានបន្តទៀតថា កម្មករសំណង់ និងកម្មករក្នុងវិស័យសេវាកម្ម ដូចជាតាមភោជនីដ្ឋាននានាជាដើម ក៏មិនបានទទួលការការពារ លក្ខខណ្ឌការងារល្អ ការងារមានសន្តិសុខ និងការកំណត់ប្រាក់ឈ្នួលអប្បរមានៅឡើយទេ ផ្ទុយទៅវិញ រាជរដ្ឋាភិបាល បាននឹងកំពុងរៀបចំបង្កើតច្បាប់សហជីព និងច្បាប់ស្តីពីសមាគម និងអង្គការមិនមែនរដ្ឋាភិបាល ដែលជាហេតុនាំឲ្យមានការព្រួយបារម្មណ៍យ៉ាងខ្លាំង ពីសំណាក់សកម្មជនការពារសិទ្ធិមនុស្សនៅកម្ពុជា។

គួរបញ្ជាក់ផងដែរថា សហព័ន្ធសហជីព និងសមាគម ដែលជាសមាជិករបស់ សហភាពការងារកម្ពុជា រួមមាន៖ សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា(C-CAWDU) សហព័ន្ធសហជីពកម្មករនិយោជិកវិស័យទេសចរណ៍និងសេវាកម្មកម្ពុជា(CTSWF) សមាគមសេដ្ឋកិច្ចក្រៅប្រព័ន្ធ(IDEA) សមាគមមន្រ្តីរាជការឯករាជ្យកម្ពុជា(CICA) សមាគមកសិករ(FAPD) សហព័ន្ធសហជីពចំណីអាហារនឹងសេវាកម្មកម្ពុជា(CFSWF) និងសហព័ន្ធសហជីពវិស័យសំណង់នឹងព្រៃឈើ(BWTUC)។

លោក អាត់ ធន់ ក៏បានលើកឡើងទៀតថា ទិវាពលកម្មអន្តរជាតិ លើកទី១២៥ ឆ្នាំនេះ សហភាពការងារកម្ពុជាដើរលើបរិបទថ្មីមួយគឺ កម្មករនិងសហជីព ទាមទារឲ្យមានការយកចិត្តទុកដាក់ និងការងារផលប្រយោជន៍របស់ពួកគាត់ ព្រមទាំងធ្វើកំណែទំរង់សេដ្ឋកិច្ចជួនមនុស្សជាតិ។ ដូច្នេះហើយយើងបានដាក់សំណើរទៅកាន់រដ្ឋសភាជាតិ រដ្ឋាភិបាល និងញាតិទៅកាន់ក្រសួងយុតិធម៌ ចំនួន១០ចំនុចដូចខាងក្រោម៖

រាជរដ្ឋាភិបាលត្រូវ បញ្ឈប់រាល់ការប៉ុនប៉ងបង្កើតច្បាប់ ដែលរឹតត្បិតសេរីភាពសហជីព សមាគម និងអង្គការមិនមែនរដ្ឋាភិបាល
រាជរដ្ឋាភិបាលត្រូវ កំណត់ប្រាក់ឈ្នួលរស់នៅសមរម្យសម្រាប់គ្រប់វិស័យ ជាពិសេសវិស័យសេវាកម្មនិងសំណង់
រាជរដ្ឋាភិបាលត្រូវដាក់ចេញនូវការសម្រេចមួយឲ្យក្រុមហ៊ុនទាំងអស់បញ្ឈប់ការប្រើប្រាស់កិច្ចសន្យាខ្លី និងម៉ៅការបន្តខុសច្បាប់
សូមរាជរដ្ឋាភិបាល និងនិយោជក បញ្ឈប់ការប្រើប្រាស់ប្រព័ន្ធតុលាការ ដើម្បីគំរាមកំហែងចាប់ខ្លួនសកម្មជនសហជីព និងសិទ្ធិមនុស្ស
សូមឲ្យមានការដោះលែងលោក សួស សន្ថា ប្រធានសហជីព ឲ្យមានសេរីភាពឡើងវិញ ព្រោះវាជាការចោទប្រកាន់ដ៏អយុត្តិធម៌
រាជរដ្ឋាភិបាលត្រូវចាត់វិធានការឲ្យមានប្រសិទ្ធភាពចំពោះក្រុមហ៊ុនចំនួន១៣ ឲ្យទទួលយកកម្មករចំនួន១៤០នាក់ ដែលត្រូវបានបញ្ឈប់ដោយសារតែការចូលរួមកូដកម្មទាមទារប្រាក់ឈ្មួលការពីថ្ងៃទី ១៣ ដល់ ១៦ ខែកញ្ញា ឆ្នាំ២០១០ ចូលធ្វើការវិញ។
រាជរដ្ឋាភិបាលត្រូវបង្កើតតុលាការការងារ ដើម្បីធានាដល់យុតិ្តធម៌ការងារនៅក្នុងសង្គមឲ្យបានឆាប់
រាជរដ្ឋាភិបាលត្រូវគ្រប់គ្រង និងពង្រឹងប្រព័ន្ធសុខភាព និងសុវត្ថិភាពនៅកន្លែងការងារ និងប្រព័ន្ធសន្តិសុខសង្គមសំរាប់កម្មករគ្រប់វិស័យ ជាពិសេស វិស័យសំណង់ សេវាកម្ម និងអ្នកប្រមូលសំរាម
រាជរដ្ឋាភិបាលត្រូវរៀបចំ បញ្ចុះតំលៃប្រេងសាំងមកត្រឹម ៣០០០រៀល ក្នុងមួយលីត្រ និងតំលៃទំនិញទីផ្សារដែលជាតម្រូវការចាំបាច់របស់ប្រជាជន
រាជរដ្ឋាភិបាលត្រូវពិនិត្យឡើងវិញចំពោះមន្រ្តីរបស់ខ្លួនជាពិសេសមន្ត្រីប៉ូលីសចរាចរណ៍ដែល ធ្វើការផាកពិន័យបង្ខំឲ្យបង់ប្រាក់លើសពីច្បាប់កំណត់

យើងសង្កេតឃើញថាមានតំណាងរាស្រ្តមកពីគណបក្ស សមរង្ស៊ី ក៏បានអញ្ជើញមកចូលរួមក្នុងពិធីនោះតាមការអញ្ជើញរបស់ សហភាពការងារកម្ពុជាផងដែរ។

លោក អាត់ ធន់ បានបញ្ជាក់ឲ្យដឹងថា សហភាពការងារកម្ពុជា បានធ្វើលិខិតអញ្ជើញ អ្នកតំណាងរាស្រ្តចំនួនបីរូបរួមមាន ឯកឧត្តម ជាម យៀប តំណាងរាស្រ្តគណបក្ស ប្រជាជនកម្ពុជា ឯកឧត្តម កឹម សុខា តំណាងរាស្រ្តគណបក្ស សិទ្ធិមនុស្ស និងឯកឧត្តម គង់ គាំ តំណាងរាស្រ្តគណបក្ស សមរង្ស៊ី ប៉ុន្តែជាក់ស្តែង មានតែអ្នកតំណាងរាស្រ្តមកពីគណបក្ស សមរង្ស៊ី ប៉ុណ្ណោះដែលមានវត្តមាន។

ក្បួនដែង្ហបានមកជួបជុំគ្នានៅខាងមុខ រដ្ឋភាពដើម្បីសម្តែងនូវទុក្ខសោករបស់កម្មករ កម្មការិនី

បន្ទាប់ពីការថ្លែងសុន្ទរកថា របស់តំណាងសហភាព សហព័ន្ធ សមាគម អង្គការក្រៅរដ្ឋាភិបាល និងអ្នកតំណាងរាស្រ្តរួចមក តំណាងសហភាពដែលមានលោក អាត់ ធន់ ព្រមទាំងតំណាងសហព័ន្ធ និងសមាគម ក៏បានយកសំណើរទៅដាក់ជូន រដ្ឋសភាជាតិ និងយកញាតិទៅក្រសួងយុត្តិធម៌ ប៉ុន្តែមានតែសំណើរទៅរដ្ឋសភាជាតិប៉ុណ្ណោះត្រូវបានទទួលយក ដោយឡែកញាតិដែលបញ្ជូនទៅក្រសួងយុត្តិធម៌មានការយឺតយាវពេក ជាហេតុធ្វើខកខានជួបជាមួយនឹងអ្នកទទួលពាក្យ។

លោក អាត់ ធន់ តំណាងសហភាពការងារកម្ពុជា បានមានប្រសាសន៍ថា លោកនឹងព្យាយាមជាថ្មីម្តងទៀតនៅថ្ងៃអង្គារ៍ សប្តាហ៍ក្រោយ តែទោះជាយ៉ាងណាលោកមានការសប្បាយរីករាយជាខ្លាំង និងថ្លែងអំណរគុណចំពោះ ការគាំទ្រពីសំណាក់អាជ្ញាធរ អង្គការក្រៅរដ្ឋាភិបាល និងជាពិសេសអ្នកតំណាងរាស្រ្ត ដល់សកម្មភាពរបស់កម្មករ កម្មការិនីក្នុងឱកាសទិវាពលកម្មអន្តរជាតិលើកទី១២៥នេះ។

តំណាងសហភាពកម្ពុជា លោក អាត់ ធន់ សង្ឃឹមយ៉ាងមុតមាំថា រាជរដ្ឋាភិបាលនឹងព្យាយាមដោះស្រាយសំណើរទាំង១០ខាងលើ និងនៅតែបន្តសហការណ៍និងគាំទ្រសកម្មភាពរបស់ សហភាព គ្រប់ពេលវេលា៕

Wednesday, April 27, 2011

ជំរើសចុងក្រោយរបស់ប្រជាជនគឺមកខាងមុខផ្ទះសម្តេចនាយករដ្ឋមន្រ្តី

អ្នកភូមិនៅរងចាំការជួយអន្តរាគមន៍នៅខាងមុខផ្ទះលោកនាយករដ្ឋមន្រ្តី ដោយកាន់រូបថតលោកនិងភរិយារបស់លោក ដោយសង្ឃឹមថាការធ្វើបែបនេះនឹងឆាប់ទទួលបានជំនួយ

រាជធានីភ្នំពេញ៖ យ៉ាងហោចណាស់ក៏មានប្រជាជនប្រមាណជា ៤០ នាក់ មកពី ឃុំស្រែចារ ឃុំពីរធ្នូ និងឃុំឃ្សឹម ស្រុកស្នួល ខេត្តក្រចេះ បាននាំគ្នាមកស្វែងរកជំនួយពីលោកនាយករដ្ឋមន្រ្តីនៃព្រះរាជាណាចក្រកម្ពុជា នាព្រឹកថ្ងៃទី២៧ ខែមេសានេះ លើបញ្ហាដីធ្លីរបស់ពួកគាត់ជាមួយនឹងក្រុមហ៊ុនដែលបានអះអាងថា បានទទួលសិទ្ធិក្នុងការកាន់កាប់ដីតាមរយៈសម្បទាន។

យោងតាមសម្តីរបស់ប្រជាពលរដ្ឋដែលមានវត្តមាននៅទីនោះបានឲ្យដឹងថា ពួកគាត់មកខាងមុខផ្ទះរបស់លោកនាយករដ្ឋមន្រ្តីថ្ងៃនេះ គឺតំណាងឲ្យប្រជាពលរដ្ឋប្រមាណ ៧៤គ្រួសារ នៅក្នុងឃុំ ពីរធ្នូ និងឃុំឃ្សឹម ដែលរងផលប៉ះពាល់ពីសំណាក់ក្រុមហ៊ុន សុវណ្ណវទ្ធី និងសំណាងអង្គរ ព្រមទាំង១១០ គ្រួសារក្នុងឃុំស្រែចារ ស្រុកស្នួល ខេត្តក្រចេះ ដែលរងផលប៉ះពាល់ពីសំណាក់ក្រុមហ៊ុន ស៊ី អាយ វី។

ពួកគាត់បានបន្តទៀតថា ក្រុមហ៊ុនដូចបានរៀបរាប់ឈ្មោះខាងលើ បានធ្វើការហាមឃាត់ប្រជាជន មិនឲ្យធ្វើការដាំដុះលើដីរបស់ពួកគាត់ ដែលធ្លាប់តែដាំដុះបង្កបង្កើនផលជាយូរមកហើយ។ មិនតែប៉ុណ្ណោះក្រុមហ៊ុនបានដាក់កំលាំងប៉េអឹម ជាច្រើនដើម្បីគំរាមកំហែងមិនឲ្យពួកគាត់ធ្វើការដាំដុះលើដី របស់ពួកគាត់ដែលត្រូវបានរឹបអូសដោយក្រុមហ៊ុន។

ពួកគាត់បានបញ្ជាក់ថា កងកំលាំងប៉េអឹមទាំងនោះ បញ្ជាដោយលោក ចិន ហុងស្រ៊ី ខុទ្ទកាល័យខេត្ត។

បន្ទាប់ពីមានការជួបជុំរបស់ប្រជាជននៅខាងមុខផ្ទះលោកនាយរដ្ឋមន្រ្តីប្រមាណជា ១០នាទី គេឃើញមានមន្រ្តីនរគបាល បានមកអញ្ជើញអ្នកភូមិទាំងនោះឲ្យទៅរងចាំចំណាត់ការពីតំណាងខុទ្ទកាល័យនាយករដ្ឋមន្រ្តី នៅខាងមុខវត្តបុទុមវត្តី ក្រោមដើមពោធិមួយដើមវិញ ដោយបញ្ជាក់ថា បើពួកអ្នកភូមិនៅរងចាំខាងមុខផ្ទះរបស់សម្តេច នោះនឹងពុំមានដំណោះស្រាយឡើយ។

បន្ទាប់ពីអ្នកភូមិទាំងនោះបានសំរេចចិត្តទៅខាងមុខវត្តបុទុមវត្តី តំណាងខុទ្ទកាល័យនាយករដ្ឋមន្រ្តីក៏បានមកជួបដូចសន្យា ហើយបានណែនាំអ្នកភូមិទាំងនោះឲ្យធ្វើជាលិខិតស្នើសុំអន្តរាគមន៍ ពីសម្តេចនាយករដ្ឋមន្រ្តី។

នៅវេលាម៉ោងប្រហែល ២រសៀល លោកអភិបាលស្រុកស្នួលក៏បានមកដល់ហើយក៏បានព្យាយាម បញ្ចុះបញ្ចូលអ្នកភូមិទាំងនោះឲ្យត្រលប់ទៅកាន់លំនៅឋានវិញ ហើយសន្យាថានឹងដោះស្រាយបញ្ហានោះ នៅថ្ងៃទី២៨ ខែមេសា ដោយអញ្ជើញទាំងតំណាងក្រុមហ៊ុន ឲ្យចូលរួមផងដែរ។ ប៉ុន្តែលោកអភិបាលស្រុក ក៏បានបញ្ជាក់ផងដែរថា លោកមិនធានាថានឹងអាចដោះស្រាយជូនប្រជាជនតាមសំណូមពរបានមួយរយភាគរយទេ។

គួរបញ្ជាក់ផងដែរថា ប្រជាជនដែលរងគ្រោះហាក់ដូចជាគ្មានជំនឿលើពាក្យសន្យារបស់លោកអភិបាលស្រុកឡើយ ព្រោះបន្ទាប់ពីលោកអភិបានស្រុកបានអញ្ជើញពួកគាត់ឲ្យត្រឡប់ទៅវិញ ពុំមានអ្នកភូមិណាម្នាក់ចង់ត្រឡប់ទៅវិញតាមការស្នើសុំនោះឡើយ។

ពួកអ្នកភូមិបាននិយាយថា ពួកគាត់មកកាន់ផ្ទះរបស់សម្តេចនាយករដ្ឋមន្រ្តី គឺដោយសារតែវាជាជំរើសចុងក្រោយរបស់ពួកគាត់ បន្ទាប់ពីការព្យាយាមស្វះស្វែងរកដំណោះស្រាយនៅថ្នាក់ ភូមិ ឃុំ ស្រុក និងខេត្តមិនបានសំរេចមក៕៚

Monday, March 14, 2011

ក្រុមហ៊ុនវៀតណាមនៅតែបន្តសកម្មភាពកាប់បំផ្លាញព្រៃឡង់

ដោយ ទីន ហ្សាការីយ៉ា

2011-03-14

ការ ទាមទាររបស់ប្រជាសហគមន៍រស់នៅតំបន់ព្រៃឡង់ សុំឲ្យក្រុមហ៊ុនវៀតណាមបញ្ឈប់សកម្មភាពកាប់បំផ្លាញព្រៃឈើ រហូតមកទាល់ពេលនេះមិនទាន់មានការដោះស្រាយទេ។

តំណាងរាស្ត្រគណបក្សសមរង្ស៊ីមណ្ឌលកំពង់ធំ បានឲ្យដឹងនៅថ្ងៃទី១៣ មីនាថា លោកនឹងយកពាក្យបណ្ដឹងប្រជាពលរដ្ឋចំនួនបួនខែត្រ ដែលរស់នៅតំបន់ព្រៃឡង់ ដាក់ជួនប្រធានរដ្ឋសភា និងលោកនាយករដ្ឋមន្ត្រី ហ៊ុន សែន នៅដើមសប្ដាហ៍ក្រោយនេះ ដើម្បីសុំឲ្យអន្តរាគមន៍ទៅក្រុមហ៊ុនវៀតណាមបញ្ឈប់កាប់បំផ្លាញព្រៃ ឡង់តទៅទៀត ដែលធ្វើឲ្យប៉ះពាល់ដល់ជីវភាពប្រជាពលរដ្ឋ។

លោក ម៉ែន សុថាវរិន្រ្ទ តំណាងរាស្ត្រគណបក្សប្រឆាំង ប្រចាំខែត្រកំពង់ធំ បានមានប្រសាសន៍ថា ក្នុងនាមលោកជាអ្នកតំណាងរាស្ត្រ និងប្រជាពលរដ្ឋ បានគ្រោងនឹងដាក់ពាក្យបណ្ដឹងទៅប្រធានសភា និងលោកនាយករដ្ឋមន្ត្រីនេះ ដោយសារតែគ្មានអ្នកណាអាចដោះស្រាយបញ្ហា ដែលក្រុមហ៊ុនវៀតណាមកំពុងតែកាប់បំផ្លាញព្រៃឡង់នេះបានទេ ដែលធ្វើឲ្យប៉ះពាល់ការរស់នៅរបស់ប្រជាពលរដ្ឋ ៖ "ខួចបរិស្ថាន ខួចព្រៃឡង់អីទាំងអស់ ហើយខ្ញុំនឹងសរសេរលិខិតទៅសម្ដេចនាយក មានតែសម្ដេចនាយកទេ ដែលអាចដោះស្រាយបញ្ហានេះបាន"។

កាលពីថ្ងៃទី១១ មីនា កន្លងទៅ មជ្ឈមណ្ឌលសិទ្ធិមនុស្សកម្ពុជា បានរៀបចំវេទិកាសាធារណៈមួយ នៅក្នុងឃុំមានរិទ្ធ ស្រុកសណ្ដាន់ ខែត្រកំពង់ធំ ដែលមានអ្នកតំណាងរាស្ត្រមកពីគណបក្សចំនួន៤ ចូលរួម គឺគណបក្សសមរង្ស៊ី គណបក្សសិទ្ធិមនុស្ស គណបក្សនរោត្តមរណឫទ្ធិ និងគណបក្សហ្វ៊ុនស៊ិនប៉ិច ព្រមទាំងអភិបាលរងខែត្រកំពង់ធំ និងមន្ត្រីមួយចំនួនទៀត។ នៅខណៈនោះ លោក មែន សុថាវរិន្រ្ទ បានអះអាងថា លោកបានចូលទៅមើលរោងម៉ាស៊ីនអារឈើនៅក្នុងស្រុកសណ្ដាន់នោះ តែត្រូវបានសមត្ថកិច្ចមិនឲ្យលោកចូលទៅមើលនោះទេ ដោយពួកគេបានការពារក្រុមហ៊ុនទៅវិញ។

អភិបាលរងខែត្រកំពង់ធំ លោក អ៊ុត សំអន បានមានប្រសាសន៍នៅថ្ងៃទី១៣ មីនានេះថា បានជារដ្ឋាភិបាលបានផ្ដល់ដីសម្បទានសេដ្ឋកិច្ចឲ្យក្រុមហ៊ុនវៀតណាម ស៊ីអរស៊ីខេ (CRCK) អភិវឌ្ឍន៍ដាំដើមកៅស៊ូនៅក្នុងស្រុកសណ្ដាន់នោះ ដោយសាររដ្ឋាភិបាលចង់អភិវឌ្ឍន៍នៅនឹងកន្លែង និងចង់កែប្រែទម្លាប់រស់នៅរបស់ប្រជាពលរដ្ឋ ដែលកន្លងមកពឹងលើតែអនុផលព្រៃឈើនោះ។ លោក អ៊ុត សំអន បានបញ្ជាក់ថា ការដាក់ពាក្យបណ្ដឹងរបស់ប្រជាពលរដ្ឋនេះ ជាសិទ្ធិរបស់ប្រជាពលរដ្ឋ។

ការលើកឡើងរបស់អភិបាលរងខែត្រដូច្នេះ តំណាងសហគមន៍ជនជាតិភាគតិចកួយ ដែលរស់នៅអាស្រ័យលើអនុផលព្រៃឈើតាំងពីជីដូនជីតារបស់ពួកគេមក ហើយនោះ បានមានប្រតិកម្មថា រដ្ឋាភិបាលបានផ្ដល់ដីសម្បទានសេដ្ឋកិច្ចឲ្យក្រុមហ៊ុននេះ កំពុងតែរុញច្រានឲ្យអ្នកភូមិធ្លាក់ពីម្ចាស់ព្រៃទៅជាអ្នកស៊ី ឈ្នួលគេវិញ ហើយកូនចៅរបស់ពួកគេទៅមុខទៀត តើពួកគេពឹងលើអ្វីទៀត ប្រសិនបើព្រៃឈើត្រូវបានគេកាប់បំផ្លាញអស់នោះ។

លោក ឈៀង វុទ្ធី បានលើកឡើងថា ប្រជាពលរដ្ឋចំនួនបួនខែត្រ មានខែត្រកំពង់ធំ ខែត្រព្រះវិហារ ខែត្រក្រចេះ និងខែត្រស្ទឹងត្រែងដែលរស់នៅតំបន់ព្រៃឡង់កំពុងប្រមូលស្នាមដៃ ដើម្បីដាក់ពាក្យបណ្ដឹងទៅប្រធានរដ្ឋសភា និងលោកនាយករដ្ឋមន្ត្រីតាមរយៈតំណាងរាស្ត្រគណបក្សប្រឆាំងនោះ ៖ "វា មិនថាព្រៃស្រោងទាំងស្រុងទេ ហើយមួយផ្នែកទៀត ការកាប់ព្រៃអានាធិបតេយ្យខ្លះ ដែលជាមិនមានការគ្រប់គ្រងហ្មត់ចត់ អ៊ីចឹងវាជាបញ្ហាមួយដែរ"។

ព្រៃឡង់ដែលមានឈ្មោះជាភាសាជនជាតិកួយ មានន័យថា «ព្រៃរបស់យើងទាំងអស់គ្នា» ស្ថិតនៅភាគខាងជើងប្រទេស គឺជាព្រៃស្រោងធំបំផុតនៅតំបន់អាស៊ីភាគអាគ្នេយ៍ មានទំហំ ៣.៦០០គីឡូម៉ែត្រក្រឡា ជាប់ខេត្តចំនួន៤ គឺខេត្តក្រចេះ ស្ទឹងត្រែង កំពង់ធំ និងព្រះវិហារ។ ហើយប្រជាពលរដ្ឋប្រមាណ ២០ម៉ឺននាក់កំពុងរស់នៅអាស្រ័យផលនៃអនុផលព្រៃឈើនេះ។

លោក អ៊ុត សំអន បានឲ្យដឹងទៀតថា នៅក្នុងខែត្រកំពង់ធំ នៅក្នុងខែត្ររបស់លោក មានក្រុមហ៊ុនក្នុងស្រុកនៅក្រៅស្រុកប្រមាណ ២០ក្រុមហ៊ុន ដែលទទួលបានដីសម្បទានសេដ្ឋកិច្ចពីរដ្ឋាភិបាលក្នុងចំណោមក្រុមហ៊ុន ទាំងនោះ ទទួលបានដីទំហំចន្លោះ ១ពាន់ហិកតារ ដល់ជិត ១ម៉ឺនហិកតារ អភិវឌ្ឍន៍ដាំដើមកៅស៊ូ និងដើមប្រេងខ្យល់៕