ដោយ មណ្ឌល កែវ
2012-06-19
តុលាការខេត្តពោធិ៍សាត់ បានចេញដីកាកោះហៅប្រធានសហគមន៍ព្រៃឈើឃុំក្បាលត្រាច តាមបណ្ដឹងរបស់ក្រុមហ៊ុនភាពីម៉ិច (PHEAPIMEX)។ ការកោះហៅនេះត្រូវបានអង្គការក្រៅរដ្ឋាភិបាលមួយចំនួនចាត់ទុកថា ជាការគំរាមកំហែង និងជាការបំបិទសិទ្ធិបញ្ចេញមតិរបស់ប្រជាពលរដ្ឋ។
ប្រធានសហគមន៍ព្រៃឈើឃុំក្បាលត្រាច ស្រុកក្រគរ ខេត្តពោធិ៍សាត់ ត្រូវតុលាការកោះហៅដោយចោទប្រកាន់ពីបទថា បានញុះញង់ឲ្យប្រជាពលរដ្ឋធ្វើការតវ៉ាបណ្ដាលឲ្យរាំងស្ទះការងារ អភិវឌ្ឍរបស់ក្រុមហ៊ុន។
លោក គុជ វេង ជាប្រធានសហគមន៍ព្រៃឈើឃុំក្បាលត្រាច។ លោកបានឲ្យដឹងនៅព្រឹកថ្ងៃទី១៧ ខែមិថុនា ថា ការកោះហៅនេះបានធ្វើឲ្យលោកមានការព្រួយបារម្ភ ព្រោះលោកមិនដែលបានធ្វើការញុះញង់នរណានោះទេ។
លោកថា ការតវ៉ាជាច្រើនលើករបស់ប្រជាពលរដ្ឋក្នុងឃុំក្បាលត្រាច កើតឡើងដោយសារក្រុមហ៊ុនបានឈូសឆាយប៉ះពាល់លើដីស្រែ ចំការរបស់ប្រជាពលរដ្ឋ ធ្វើឲ្យពួកគាត់ខឹងសម្បា ហើយនាំគ្នាតវ៉ាដោយខ្លួនឯងពុំមានការញុះញង់ពីនរណានោះទេ៖ «បើ គេចង់ដាក់គុកខ្ញុំ ក៏គេដាក់ទៅ តែគ្រាន់តែថា ខ្ញុំមិនដែលបានទៅញុះញង់អ្នកណាទេ។ មានប្រជាពលរដ្ឋជាសាក្សីគេមកឈូសដើមស្វាយ ដើមខ្នុរ ដែលគាត់ដាំតាំងពីសម័យខ្មែរក្រហមនៅក្នុងព្រៃនៅឡើយ សូម្បីតែលោកមេភូមិក៏គាត់មកបបួលពួកខ្ញុំ និងប្រជាពលរដ្ឋឲ្យតវ៉ាដែរ...»។
កាលពីថ្ងៃទី៣ មេសា កន្លងទៅ ប្រជាពលរដ្ឋមកពីភូមិចំនួន ៦ ក្នុងឃុំក្បាលត្រាច ស្រុកក្រគរ ខេត្តពោធិ៍សាត់ បានលើកគ្នាកាន់ការដ្ឋានថ្មីរបស់ក្រុមហ៊ុនភាពីម៉ិច នៅចំណុចខ្នាចអន្សោង ស្ថិតក្នុងភូមិក្រឡាញ់ ដើម្បីធ្វើការរារាំងបញ្ឈប់មិនឲ្យគ្រឿងចក្រឈូសឆាយលើដីស្រែ ចំការរបស់ពួកគាត់ទៀត។
ប្រជាពលរដ្ឋមកពី៦ភូមិ គឺភូមិក្រឡាញ់ ភូមិស្រែឫស្សី ភូមិដូង ភូមិទទឹង ភូមិកំពង់លើ និងភូមិសំរោង ប្រមាណ ១០០នាក់ បានខឹងសម្បា ហើយលើកគ្នាមកសុំជួបតំណាងក្រុមហ៊ុនដើម្បីសួរនាំពីមូលហេតុដែល ក្រុមហ៊ុនចេះតែរំលោភបំពានលើដីស្រែចំការរបស់ពួកគាត់។
ព្រះរាជអាជ្ញារងអមសាលាដំបូងខេត្តពោធិ៍សាត់ លោក ប៉ង់ ចាន់សុយុទ្ធារ៉ា មានប្រសាសន៍ថា ការកោះហៅប្រធានសហគមន៍ព្រៃឈើឃុំក្បាលត្រាចនេះ គឺធ្វើឡើងតាមពាក្យបណ្ដឹងរបស់ក្រុមហ៊ុនភាពីម៉ិច ដោយក្រុមហ៊ុនបានចាត់ទុកថា ការតវ៉ាបែបនេះបានធ្វើឲ្យរាំងស្ទះដល់ការអភិវឌ្ឍរបស់ក្រុមហ៊ុន៖ «បាទ! យើងពិតជាបានកោះហៅគាត់ឲ្យចូលមកបំភ្លឺតាមពាក្យបណ្ដឹងរបស់ក្រុមហ៊ុនពីបទញុះញង់ឲ្យប្រជាពលរដ្ឋងើបឡើងតវ៉ា...»។
យ៉ាងនេះក្ដី មន្ត្រីសម្របសម្រួលសមាគមអាដហុក ការពារសិទ្ធិមនុស្ស និងមន្ត្រីសម្របសម្រួលអង្គការលីកាដូ ប្រចាំខេត្តពោធិ៍សាត់ បានចាត់ទុកការកោះហៅនេះថា ជាការប្រើប្រាស់ប្រព័ន្ធតុលាការដើម្បីគំរាមកំហែងកុំឲ្យ ប្រជាពលរដ្ឋហ៊ានបញ្ចេញមតិ និងតវ៉ាពីការបាត់បង់ដីធ្លីរបស់ពួកគេ។
លោក ភួង សុធា មន្ត្រីសម្របសម្រួលសមាគមអាដហុក ការពារសិទ្ធិមនុស្សប្រចាំខេត្តពោធិ៍សាត់៖ «នេះ គឺជាសកម្មភាពមួយក្នុងបំណងបង្អាក់ការតវ៉ារបស់ប្រជាពលរដ្ឋ។ គឺជាការគំរាមកំហែងស្មារតី កុំឲ្យប្រជាពលរដ្ឋហ៊ានងើបឡើងតវ៉ាទៀត...»។
ទំនាស់ដីធ្លីរវាងប្រជាពលរដ្ឋក្នុងខេត្តពោធិ៍សាត់ ជាមួយក្រុមហ៊ុនភាពីម៉ិច បានអូសបន្លាយអស់រយៈពេលជាច្រើនឆ្នាំមកហើយនៅពុំទាន់មាន ដំណោះស្រាយនៅឡើយ។ ទំនាស់នេះបានកើតមានជាអំពើហិង្សាដោយប្រជាពលរដ្ឋបាននាំគ្នាតវ៉ា បិទផ្លូវជាតិលេខ៥ ចំនួន ២លើកមកហើយ៕
No comments:
Post a Comment